“ ခေါင်း “ မရှိသူများ

“ ခေါင်း “ မရှိသူများ
မင်းဒင် ရေးသည်

“ခေါင်း“ မရှိသူများ ။

(မင်းဒင် ရေးသည်)

ဟောကြည့်၊ စိတ်ညစ်တဲ့ အထဲမှာ အဲဒါတွေ ထိပ်ဆုံးကပါတယ်။ ခင်ဗျားဥစ္စာ ခေါင်းစဉ်ကို စ ဖတ်လိုက် ကတည်းက မှားနေပြီ၊ ဘာတဲ့ “ခေါင်း “ မရှိသူများ၊ ဟုတ်လား။ ခက်တယ်ဗျာ။ “ခေါင်း“ မရှိရင်လည်း ဖျာလိပ်နဲ့သာ ပတ်ပြီးမြှုပ်လိုက်ပေတော့ဗျာ။ခင်ဗျား ဖတ်လိုက် တဲ့ “ခေါင်း“ဆိုတာက လူသေတွေထည့်တဲ့ “ခေါင်း“ ဗျ ။“ ခေါင်း“မရှိ ရအောင် ကျုပ်ကို သုဘရာဇာ တွေလို ခေါင်း တလားအရောင်း အဝယ်လုပ်နေတယ် မှတ်လို့လား။မြန်မာ စာမှာ ရေးတော့အမှန် ဖတ်တော့အသံလို့ ဆိုသမို့လား။ကျုပ်ပြောချင်တာက စဉ်းစားတဲ့ ခေါင်း တွေးခေါ်တဲ့ခေါင်း၊ ပုခုံးနှစ်ဖက်ကြားက ခေါင်း၊ဦးခေါင်း (ဂေါင်း) အကြောင်းပါဗျာ။ အဲဒီ “ခေါင်း“အကြောင်း ပြောချင်တာကလည်း အကြောင်း ရှိလေရဲ့ ။ဒီလိုဗျ။

…………….
အခုတလော ကျုပ်လည်း ကမ္ဘာ့အရေးမြန်မာ့အရေး ၊အရေးတကာ့ အရေးဘယ်အရေးမှ လှည့်မကြည့်ချင်လောက် အောင် “ခေါင်း“ ခြောက်တာနဲ့ ကံချွန်ရဲ့ဟာသ၊ လူထုဦးလှရဲ့ ကျောင်းကန်အနီးမှ ပုံပြင်များ၊ မောင်ကောင်းထိုက်ရဲ့ ဟာသတို့လို ပေါ့ပေါ့ပါးပါး စာတွေ ပဲလျှောက်ဖတ်နေတော့သဗျာ။
ဒီမှာတင် Ripley ရဲ့ Believe it or not ဆိုတဲ့ စာအုပ်ကိုမောင်သိန်းလွင်က “ယုံချင်ယုံမယုံ ချင်နေ“ဆိုပြီး ဘာသာပြန်ထားတဲ့ စာတအုပ် တောင်လှန်မြောက်လှန် လျှောက်လုပ်လိုက်တာအဲဒီအထဲမှာ ကြံကြံဖန်ဖန် ဖြစ်ရပ်တခုကိုလည်း သွားဖတ်မိသဗျာ။ ။
………………………..
ဘာတဲ့“ ဦးခေါင်းမဲ့သော ကြက် “တဲ့ ။ပေါက်ပေါက်ရှာရှာတော့ မထင်ပါနဲ့ဗျာ။၁၉၀၄ ခုနှစ် နိုဝင်ဘာလ (၁၂) ရက်နေ့မှာ ဖြစ်ခဲ့တယ်ဆိုပဲ။အမေရိကန်ပြည်ထောင်စု မစ်ချီဂန် ပြည်နယ် ၊ ဆော့စိန့်မေရီက ဘယ်လ်ဗေးဒါး ဟိုတယ်မှာတဲ့ဗျာ။ဟိုတယ်စားဖိုမှူး ဟားဗတ် ဗီ ဟပ်ဂ်စ် က ကြက်သားဟင်းချက်မလို့ ကြက်တွေကို တကောင်ပြီးတကောင် သတ်နေသတဲ့။ သတ်ပုံသတ် နည်းကလည်း စဥ့်တီတုံးပေါ်တင်၊ တဖက်က ကိုင်ထားတဲ့ ပုဆိန်လေးနဲ့ခေါင်းတွေ ကို ဖြတ် တာတဲ့ ။ သူ့ဘေးက အကူဝန်ထမ်းအမျိုးသမီးက စားဖိုမှူးခေါင်းဖြတ်ထား တဲ့ ကြက်အသေ တွေကို အမွှေးနှုတ်ရသတဲ့ ။
အဲဒီအမျိုးသမီးဟာ ခါတိုင်းလိုပဲ ကြက်သေတွေကို အမွှေးနှုတ်နေရာကနေ အလန့်တကြား ဟိုတယ်အပြင်ကို ထွက်ပြေးသွားပါရောတဲ့ ။ထွက်ပြေးရတဲ့ အကြောင်းက ကြက်အသေတွေ ထဲက ကြက်နက်မတကောင်ဟာ ခေါင်းလုံးဝပြတ်နေပေမဲ့ မသေးဘူးတဲ့ဗျ။ ခေါင်းပြတ်ကြီးနဲ့ ထ ရပ်ပြီး အခန်းထဲမှာ ဟိုသွားဒီသွား လျှောက်လုပ်နေလို့တဲ့ဗျာ ။

အဲဒီအဖြစ်အပျက်ဟာ ထူးဆန်းလွန်းလို့ ဆော့စိန့်မေရီ သတင်းစာတွေကလည်း ရေးသား ဖော်ပြခဲ့ကြတယ် ဆိုပဲ ။ဒါတင်ဘယ်ကအုံးမလဲ၊လူတွေအများကြီး ပျားပန်းခတ် အုပ်နဲ့ချီပြီး ဘယ်လ်ဗေးဒါးဟိုတယ်ကို ရုတ်ရုတ်သဲသဲ လာကြည့်ကြတာ နှစ်ပါတ်ကျော်တောင် ကြာ သတဲ့။
မစ္စတာ ဟပ်ဂ်စ်က အဲဒီ ကြက်ကို အစာကျွေးသေးသတဲ့ ။ကျွေးပုံက ဆေးထိုးပြွတ်ထဲမှာ အစာကိုထည့်ပြီး ခေါင်းပြတ်နေတဲ့ကြက်ရဲ့ အသားနီလန်နေတဲ့ အစာပြွန်ထဲကို ထိုးထည့်တာ တဲ့ဗျာ။ ခေါင်းပြတ်ကြက်မကလည်း အဲသလို အစာထိုးထည့်တာကို သဘောတွေ့နေပုံရသတဲ့။ အချို့အချိန်တွေမှာ ခေါင်းပြတ်ကြက်မက ဖြည်းဖြည်းချင်း ဟိုလျှေက်သွားဒီလျှောက်သွားလုပ် တယ်၊ တခါတရံမှာ ကိုယ်ကို ဆန့်ပြီး တောင်ပံခတ်တယ်။ ပွယောင်းနေတဲ့ အမွှေးတွေကို သပ်ရပ်သွားအောင် လှုပ်ခါမှု တွေလုပ်သတဲ့ ။သူ့အပြုအမူတွေဟာ ခေါင်းနဲ့ကိုယ်တွဲလျက် ရှိနေတဲ့ တကယ့်ကြက်မတကောင်လို ဆိုပဲ။တချို့အချိန်တွေဆို အိပ်တန်းတက်တဲ့ သစ်သား တန်းပေါ်တက်ပြီး ဝပ်(နား)တယ်။ ပြီးတော့ သစ်သားတန်းပေါ်မှာ နားနေရာကနေ ပြန်ထ တယ်။ တခါတရံမှာတော့ ကြက်အကောင်းတွေ ကတော် ကတော် အော်သလိုမျိုး အသံပြုဖို့ တောင် ကြိုးစားသတဲ့ ။
ခေါင်းပြတ်နဲ့ ကြက်မကို ကြည့်ရတာ ဘာနာကျင်မှု ဝေဒနာမှ မခံစားရသလိုပုံစံနဲ့ တခြား ကြက်အကောင်းတွေ လို ပုံမှန် လှုပ်ရှားသွားလာပြီး စိတ်ချမ်းသာကိုယ်ချမ်းသာ ရှိနေပုံပဲ တဲ့ ဗျား။အဲဒီကြက်မဟာ ခေါင်းပြတ်ပြီးတဲ့နောက် တဆယ့်ခုနှစ်ရက်တိတိ အသက်ရှင်နေခဲ့သေး သတဲ့ ။ဒါတောင် အဲဒီကြက်မကို စောင့်ရှောက်တဲ့သူက ပေါ့ဆပြီး သတိလက်လွတ်သွားလို့ တဲ့ ။မဟုတ်ရင် ဒီထက်ပိုပြီးတောင် အသက်ရှင်နိုင်သေးတယ်တဲ့ဗျ။ ကြက်မကို ပြုစုစောင့် ရှောက် ရတဲ့သူ အမှတ်တမဲ့ သတိမထားမိခင်မှာ ကြက်မရဲ့ လည်ပင်းက လေရှူပေါက်ပိတ်ပြီး အသက်ရှူ ကြပ်လို့ ကြက်မက သေသွားရတာပါတဲ့ဗျာ ။

အော်၊ယုံချင်ယုံ မယုံချင်နေ လို့ပြောထားပြီးပါပြီကော။ ခင်ဗျားယုံကိုယုံရမယ် လို့မပြောမိပါ လားဗျာ။ဒါပေမဲ့ဗျ၊ စောစောက ကြက် သာ ခေါင်းမရှိပဲ အသက်ရှင်နိုင်တာတော့မဟုတ်ဘူး။ ခေါင်းမရှိပဲ အောင်လံထူနေတဲ့ စစ်သူကြီးတွေလည်း ရှိပါ့ဗျာ။
………………………………

အခုလက်ရှိ မြန်မာအုပ်စိုးသူတွေလည်း ခေါင်းရှိတယ်လို့ ခင်ဗျား ထင်နေသလား။တကယ်ဆို

သိပ်မဝေးလှတဲ့ အတိတ် သမိုင်းကိုပဲ ပြန်ကြည့်ပါဗျာ။ကျုပ်တို့ နိုင်ငံဟာ အခုခေတ်မှာ မဟာအင်အားကြီး နိုင်ငံ တခု စာရင်းဝင်လာနေတဲ့ ဂန္ဓလရာဇ် တိုင်းကိုလည်း အံတုဖက်ပြိုင် ဘူးလေရဲ့။စိန့်တိုင်းစစ်တပ်က သူလာပြီဆိုရင် မိုးပေါ်ကများ ကျလာလေမလားဆိုပြီး တိမ်တွေကြားကို မျှော်ကြည့်ရလို့ တိမ်ကြားမင်းခေါင် အမည် သမုဒ်ခံရတဲ့ မြန်မာစစ်ဗိုလ်ချုပ် မင်းကြီး မဟာသီဟသူရ ၊လက်ထက်တုန်းက မိုးညှင်းကောင်းတုံကနေ မကျော်နိုင်ခဲ့တဲ့ စိန့်တိုင်းသားတွေဟာ အခု တော့ မန္တလေး အထိ ဓားတလက်မကိုင်၊ သေနတ်တချက်မှ မဖောက်ရပဲနဲ့ သိမ်းထား နိုင် လေရဲ့ဗျာ။
ဘကြီးတော်ဘုရားလက်ထက် မဟာဗန္ဓုလရဲ့ အာသံ မဏိပူရ စစ်ပွဲ သတင်းကြောင့် အိန္ဒိယ ပြည် ဘင်္ဂလားတနယ်လုံး ဖိန့်ဖိန့်တုန်သွားခဲ့ဘူး ရသတဲ့။ခုများတော့ဗျာ။ မဇ္ဈိမ တိုင်းသား တွေအလိုကျ ရိုရိုကျိုးကျိုး ဆက်ဆံနေရတဲ့ အချိန်ဖြစ်သွားပြီဗျ။ဒါတင်ဘယ်ကအုံးမလဲ ။ တကမ္ဘာလုံးက အော့ကြောလန်နေတဲ့ မြောက်ကိုးရီးယားလို နိုင်ငံမျိုးနဲ့တောင် ရွှေလမ်းငွေ လမ်း ပွင့်နေရုံမက သူ့တိုင်းပြည် သူနိုင်အောင် မစုစည်းနိုင်တော့ပဲ အကွဲကွဲ အပြဲပြဲဖြစ်ခဲ့ရတဲ့ မဟာဆိုရှယ်လစ်နိုင်ငံတော်ဟောင်းကြီးဆီကလည်း နည်းပညာတွေ ရယူနေပြီတဲ့ဗျ ။
“ခေါင်း“မရှိဆုံးဆိုတဲ့ နောက်ဆုံးမြန်မာ ကုန်းဘောင်မင်းဆက် သီပေါမင်းလက်ထက်က တိုင်းတပါးလက်ထဲပါသွား တဲ့ ပတ္တမြားငမောက်တို့ ၊လှော်ကားတင်ကြီး၊လှော်ကားတင်လေး ကျောက်တွေ အကြောင်း လျှောက် စဉ်းစားမနေပါနဲ့တော့ ဗျာ။စိန့်တိုင်းသားတွေက စက်ကြီးစက်ငယ်နဲ့ ကြိုက်တဲ့ တွင်း ကြိုက်သလောက်တူးခွင့်ရနေတဲ့ ခေတ်ကြီးကို ရောက်နေပြီကောဗျာ။ ။
……………………………………….
လက်ရှိ မြန်မာပြည် စစ်ဝါဒကို စတင်မွေးထုတ်ခဲ့တဲ့ ဗိုလ်ချုပ်ကြီး နေဝင်းဆိုတဲ့ ပုဂ္ဂိုလ်ကြီးက လည်း သူ့သဘောနဲ့သူ မြန်မာဆိုရှယ်လစ် လမ်းစဉ်ကို ထူထောင်လိုက်လို့ သူတောင်းစား တိုင်းပြည်လည်း ဖြစ်ရော ပြည်သူတွေကို မိန့်ခွန်းခြွေလိုက်တာ “ သေနတ်ဆိုတာ ၊ပစ်ရင် မိုးပေါ်ထောင်မပစ်ဘူး ၊တည့်တည့်ပစ်တယ် ၊တဲ့ ။ဆိုလိုတာက ဗျာ။ သူအသုံးမကျတဲ့ အကြောင်း ပြည်သူ တွေ ပါးစပ်ဟရဲရင် ဟကြည့် ၊အကုန်ပစ်သတ်ပစ်မယ် ဆိုတဲ့ အဓိပ္ပါယ် ဆိုတာ ရှင်းနေတာပဲ ။
ဟော၊ သူ့အရိုက်အရာကို ဆက်ခံကြတဲ့ ဒီနေ့သူ့စစ်မျိုးဆက်တွေကလည်း တိုင်းပြည်ကိုသာ ပြန်ပြီး မထူထောင်နိုင်တာ။ လူထုကို နည်းမျိုးစုံညှင်းပန်းပြီး ပစ်သတ်ဘို့အမြဲ ဝန်မလေးတဲ့ နေရာမတော့ ဆရာကောင်းတပည့် ပန်းကောင်းပန်ပဲဗျာ။ကဲ ၊“ခေါင်း“ ရှိလား ၊မရှိဘူးလား စဉ်း စားသာကြည့်ပေတော့။ ။
အတည်မပြုနိုင်သေးတဲ့ အရပ်သတင်း တပုဒ်အရဆိုရင် လာမဲ့ ၂၀၁၀ ရွေးကောက်ပွဲမှာ လိုရင် လိုသလို သုံးဘို့လက်မရွံ့ ရာဇဝတ်သားဟောင်းတွေကို ရန်ကုန်တိုင်း ရွှေပြည်သာမြို့သစ်မှာ စခန်းသွင်းနေသတဲ့ဗျာ။ ဒီလို ပြိုင်စံရှားခေါင်းတွေကို ချဉ်ရည်ချက်စားဘို့သာ ကောင်းတော့ တယ်ဗျာ။ ။
……………………………..
တကယ်“ ခေါင်း“ ရှိပြီး မျှော်ခေါ်စဉ်းစားတတ်တဲ့ ကျုပ်တို့အမျိုးသားခေါင်းဆောင်ကြီး ဗိုလ်ချုပ်အောင်ဆန်းက မြန်မာ့လွတ်လပ်ရေးအတွက် ထိုင်းနိုင်ငံဘန်ကောက်မြို့မှာ တပ်ဖွဲ့ ခဲ့တုန်းက အမြင်မတော်တာတွေ တွေ့ခဲ့တယ် ထင်ပါရဲ့။ အဲဒီလို နိုင်ငံမျိုး မဖြစ်ရလေအောင် သူ့မိန့်ခွန်းထဲမှာ အဝှာနိုင်ငံဖြစ်မသွားအောင် သတိပေးခဲ့ ဘူးသဗျ။ ဟော၊ ခုတော့ ၊ အမျိုး ဂုဏ် ဇာတိဂုဏ်နှင့် အမျိုးသားရေး စိတ်ဓာတ် ရှင်သန် ထက်မြက်စေရေးလို့ကြွေးကြော် နေ တဲ့ လက်ရှိ မြန်မာမင်းများ လက်ထက်မတော့ အဲဒီအဝှာ နိုင်ငံမှာ ကျုပ်တို့ လူမျိုး နှစ်သန်း ကျော် အဝှာတွေရဲ့ ကျွန် လာဖြစ်နေပြီဗျာ။
ခေါင်း မရှိတဲ့ ခေါင်းဆောင်တွေကြောင့် မြန်မာနိုင်ငံဖွား အမြောက်အများဟာ သူတပါး နိုင်ငံမှာ အိုးကင်းထဲထည့်လှော်ခံရသလို ဖြစ်နေတာလည်း ကိုယ်တွေ့ဗျ။ အခု ကျုပ်နေတဲ့ ဖူးခက်မြို့ မှာဆို နိုင်ငံကူးလက်မှတ် လျှောက်ရေးမလျှောက်ရေး ပြဿနာကြောင့် မြန်မာရွေ့ပြောင်း အလုပ်သမားတွေ ခေါင်းခြောက်ကုန်ကြပါပကော။
မနေ့တနေ့ကပဲ လူချင်းဆုံခဲ့တဲ့ မြန်မာအလုပ်သမလေး တယောက်က ဆိုရင် “ ကျမတော့ ပတ်စပို့အကြောင်း ခေါင်းထဲရောက်လာရင် သေသာသေလိုက်ချင်တော့တာပဲ ၊ လျှောက်မယ် ဆိုပြန်တော့ ဈေးကြီးတာက တမျိုး၊ ပြည်တွင်းမှာကျန်ခဲ့တဲ့ မိသားစုတွေဆီ ငွေညှစ်မှာ ပူရတာ တမျိုး။ မလျှောက်ပြန်တော့ နောက်တခါ အလုပ်သမားလက်မှတ်ကို သက်တမ်းတိုးမပေးတော့ ဘူး “ ဆိုပဲ ။ ကျုပ်ဖွင့်ထားတဲ့ မြန်မာပစ္စည်းဈေးဆိုင်လေးမှာလည်း တနေ့တနေ့ ပတ်စပို့ လျှောက်ရေး မလျှောက်ရေး အကြံပေးနေရတာဈေးရောင်း ရတယ်ကို မရှိပါဘူးဗျာ။ ။
……………………………….
တကယ်တော့ ရွေ့ပြောင်းအလုပ်သမားတွေရဲ့ ခေါင်းတွဲကြီးနဲ့တူတဲ့ ပြည်ပရောက် အလုပ် သမားအရေးဆောင်ရွက်နေတဲ့ အဖွဲ့တွေက ဦးဆောင်ဦးရွက်ပြုပြီး အကောင်းဆုံးနည်းလမ်း တွေ ရှာကြံသင့်တာပေါ့။ ပတ်စပို့လုပ်တယ်ဆိုတာ ကိုယ့်နိုင်ငံပြင်ပမှာ လူစာရင်း ဝင်မဲ့ ကိစ္စမို့ ဖြစ်နိုင်မဲ့ နည်းလမ်းကို ပြည်တွင်းကရော၊ ပြည်ပကပါ အောင်မြင်အောင် ဝိုင်းသင့် ဝန်းသင့် တာပေါ့။ ခုတော့ အတိုက်အခံဆိုတဲ့ မောင်တွေကလည်း အစိုးရလုပ်သမျှ အဆိုးမြင် ဘုရား တည် ရင် တောင် သာဓုမခေါ်ချင်ကြတဲ့ ဘဝရောက်ကုန်ကြယုံမက ၊ လူထုအခြေပြု အဖွဲ့ အစည်းတော်တော်များများကလည်း အာစီယံဒေသ ဆိုင်ရာ ညီလာ ခံ မှာနေရာ လုနေကြတာ နဲ့ပဲ အချိန်ကုန်နေကြသဗျာ။ခုချိန်မှာ ရွေ့ပြောင်းအလုပ်သမားတွေ့ကြည့်ရတာ ခေါင်းမပါတဲ့ ကြက် တောင်လျှောက်မြောက်လျှောက်၊လျှောက်သွားနေသလိုပဲဗျ။ ရွေ့ပြောင်းအလုပ်သမားတွေဘဝကတော့ အစိုးရက ခေါင်းဖြတ်လိုက်တဲ့ ကြက်ကို အတိုက်အခံတွေက ဂရုမစိုက်တာနဲ့ ကြာရင် အသက်ရှူလမ်းကြောင်း ပိတ်ပြီး မာလကီးယားရတော့ အဖြစ်ပါပဲဗျား ။
………………………….


ပြည်ပအကြောင်းသာ ပြောနေရတာ ပြည်တွင်းမှာကော ဘာထူးသတုန်းဗျာ။ အင်အားအကြီး ဆုံးအဖွဲ့ချုပ်ကြီးမှာလည်း ခေါင်းတွဲမပါတဲ့ ရထားကြီးလို ဖြစ်နေခဲ့တာ ကြာပါပြီကော။ ပါတီ ထိပ်တန်းခေါင်းဆောင် အကျယ်ချုပ်ကျခံနေရတဲ့ ကာလ၊ အစိုးရ က ထင်တိုင်း ကြဲနေတဲ့ အချိန်မှာ၊ စည်းကမ်းသေဝပ်စွာနဲ့၊ ငြိမ်ငြိမ်လေး အဖမ်းခံတဲ့ ဗျူဟာကနေ မတက်သေးတာ ဒီနေ့ အထိပါပဲ။ အခုလတ်တလော ပါတီညီလာခံခေါ်ဖို့တောင် ၊ ဥပဒေမရှိတဲ့ တိုင်းပြည်မှာ ဥပဒေနဲ့ညီမညီ ချိန်ဆနေကြတုန်းဗျာ။ ခေါင်းမရှိတဲ့ ကြက်က တန်းပေါ်တက်၊ အမွှေးအ တောင် ဖြန့်ပြီး ကတော်၊ ကတော်လုပ်နေပုံကိုပဲ ကျုပ်တော့ ပြေးပြေးမြင်မိတော့တာပါပဲ။ ။
…………………
အမယ် ၊သူများတွေ ခေါင်းမရှိတာ ဘာဆန်းသတုန်းဗျာ။ ကျုပ်လည်း ဒီလို စာမျိုးတွေရေးရင် အစိုးရဖက်က ဖတ်မိတော့ သူပုန်သူကန် စာရင်းသွင်းမယ်၊ အတိုက်အခံတချို့ အစိုးရလူ လို့သမုဒ်မယ်။ ဒီလိုအရပ်ဆယ်မျက်နှာက ဝိုင်းပြီးမေတ္တာပို့ကြမှာကို သိသိကြီးနဲ့ ခေါင်း အခြောက်ခံပြီးလျှောက် ရေးနေတာကိုက ခေါင်း မရှိလို့ ပေါ့ဗျ ။

ရုပ်ပုံ ။ ။ ဂူဂဲလ်